Nanomboka, omaly, eny amin’ny Lapan’ny fanatanjahantena Mahamasina, ny fifaninanana, Alley Hoop FIBA 3×3, taranja basikety. Anisan’ny nandray anjara ny ekipa nasionaly 3×3 Ankoay Senior lehilahy sy ny vehivavy, nitondra ny anarana The Warriors. Mandrafitra ireo ekipa roa ireo ny mpilalao niatrika ny fiadiana ny tompondakan’i Afrika ny desambra 2022. Arak’izay, nampiseho ny maha sangany azy izy ireo amin’ny maha tompondaka an’i Afrika.
Nibata fandresena nanoloana ny Mb2All ny The Warriors, omaly maraina, tamin’ny isa 15 no ho 8. Nandresy ny TGBC tamin’ ny isa 15 no ho 9 ny Ankoay lehilahy.
Mbola nifaninana izy ireo tamin’ny tapany hariva. Mbola nahazo fandresena. Avo lenta ny fifaninanana Alley Hoop 3×3 tamin’ity andiany faharoa ity. Betsaka ny mpandray anjara. Raitra tanteraka ny kianja sy ny trano hilalaovana. Mbola hitohy anio sy rahampitso ny fifaninanana Alley Hoop FIBA 3×3. Hetsika karakarain’ny Rdj, iaraha-miasa amin’ny FMBB sy ny mpiara-miombon’antoka toa ny Orange sy ny Star.
Mi.Raz
French