Nankalaza ny andron’ny alakamisy masina ny mpino kristianina, omaly. Andro namoronana ny eokaristia masina, izay marika famantarana mandraka ankehitriny fa miaraka amin’ireo mpino azy hatrany i Jesoa Kristy. Andro lehibe ho an’ireo manara-dia azy izany, satria fanamafisana ny fifamatorana. Mofo sy divay, na vatana sy ran’i Kristy, famantarana ny fitahiana sy fifamatorana ary dingana lalovana amin’ny famonjena. Zava-dehibe izay ilaina tokoa eo amin’ny fiainan’ny zanak’olombelona, indrindra amin’izao vanim-potoana sarotra lalovana maneran-tany izao.
Tari-dresaka fohy, natao hisintonana ny saina ho an’ny tsirairay iny. Ho fampahatsiahivana fa ilaina ny fananana finoana na foto-pinoana amin’ny fiainana. Hodidina iray ny maha kristianina fa izay hifikiran’ny saina, handrian’ny fo, mampahazo aina no zava-dehibe. Anaty sedra maro Ramalagasy amin’izao fotoana izao. Toe-java-misy tsy tongatonga ho azy. Mety ho azo hazavaina amin’ny fisainan’ny zanak’olombelona kanefa ilàna fahamalinana be amin’ny lafiny ara-panahy.
Sanatrian’ny vava ny minomino foana, fa tsy mbola nisy hatrizay no iainan’ny Malagasy ankehitriny. Loza aman’ atambo etsy sy eroa. Voina amin’ny endriny maro, mampitondra faisana ny sarambabem-bahoaka. Izany eny anivon’ny fiarahamonina, tsy asian-teny intsony. Mibiririoka sy tsy misy arofanina fa samy manao izay danin’ny kibony. Toa fanjakan’i Baroa.
Very hasina ny maha olona, voahosihosy ny soatoavina isan-karazany. Mijonjorombona, tsy misy zotra arahina ny olona. Vokany, fifanjevoana sy fahalovana mitarika fahoriana mangirifiry na ara-batana, ara-tsaina, ara-panahy no misy. Tranga tsy ahitam-bahaolana haingana sy maharitra akory, fa mikiky toa homamiadana, mamono tsikelikely ny fiarahamonina sy ny mponina.
Mila vahaolana hafa ity firenena malagasy ity. Tsy ampy intsony ny vahaolana politika sy toekarena. Asa, mety ho ilay fitodihana amin-Janahary, amin’Andriamanitra na Jehovah, na amin’i Allah, angamba ? Anaty herinandro Masina isika izao. Herinandro natao handinihan-tena sy hanaovana jery todika ny hanatsarana ny fomba fiainana. Tsy hadino, anatin’ny iray volan’ny Ramadany ihany koa, natao hifehezan-tena sy hivavahana. Aoka tsy hatao mandalo fotsiny na fanatanterahana fombafomba ivelany izany fa tena iainana.
Marary i Madagasikara sy ny mponina ao aminy. Mila fanasitranana ny firenena. Fiombonam-po amin’ny lafiny rehetra no ilaina. Mila fifanomezan-tanana sy fiaraha-mivavaka, arakaraka ny antokom-pinoany avy. Ny fivavaky ny maro no mahataka-danitra. Izay mino sy matoky ny Andriamaniny ihany no avotra ! Koa anjaran-dRamalagasy ny mahay misafidy izay lalan-kizorany, ialana amin’ny hirifiry lalina izao.
r.r
French