TSELATRA

Taxi-be 119 iray indray no nifatratra tamina moto iray teny Ankatso, omaly maraina. Tsy fantatra izay nahazo ny mpamily fa nirimorimo tampoka ilay fiara ka nitrongy ilay moto teo alohany. Potika ilay moto voatrongy raha tsy naninona kosa ilay raim-pianakaviana nitondra azy.
Azon’ny zandary tao Amboasarimasina, fokontany Ambolomborona, distrikan’Ambatondrazaka, afakomaly, ny basy roa calibre 16. Jiolahy raindahiny amin’ny fakana an-keriny ao Alaotra Mangoro no nampiasa azy ity. Tafaporitsaka nandritra ny fisamborana azy izy, niaraka tamin’ny vadiny.
Hiakatra fampanoavana anio, ireo vazaha roa lahy nidaroka vazaha iray tao amina hotely iray ao Salazamay Toamasina, afakomaly. Nodarohan’izy roa lahy ity vazaha iray ity ka naratra mafy. Mbola manaraka fitsaboana ao amin’ny Hopitalibe Toamasina ity farany.
Enim-bolana aty aoriana, efa nanaovan’ny lehilahy iray taxi-moto ny moto very teny Ambohimangakely, ny volana marsa teo. Tratran’ny zandary ilay lehilahy nitondra azy. Notondroin’io tratra io fa novidiany tao Anatihazo Isotry ilay moto. Teny Bemasoandro Itaosy kosa no nanaovana ny fifanarahana ara-barotra.