Ora vitsy taorian’ny namoahan’ny prefektiora fa tsy azo ivezivezena amin’ny alina eto Antananarivo dia nofoanana indray izany. Homena ny Colesium, Antsonjombe ny mpanao fihetsiketsehana.
Mihazakazaka ny raharaham-pirenena. Mihenjan-droa ny tady amin’ny ankolafin-kery politika. Andaniny, mikiry ny hanao tatitra eny amin’ny Kianjan’ny 13 mai, anio, ny solombavambahoaka. Tsy manaiky ny fanomezan-dalana nomena eny amin’ny Magro, Tanjombato izy ireo. Mbola nitsipaka ihany koa ny tolo-kevitry ny prefektiora mba hitady toeran-kafa. Tsy maintsy eny Analakely no hanaovan’izy ireo ny tatitra, raha ny fanazavana hatrany. Hanatevin-daharana azy ireo ihany koa ny kandidà 11 sy ny mpiara-dia aminy. Raha ny angom-baovao natao halina, hifamotoana amin’ny toerana samihafa ny mpanao fihetsiketsehana. Aorian’izay vao samy hitandrozotra ho eny amin’ny toerana hivoriana.
Andaniny, tsy hilefitra ny prefektioran’Antananarivo, miaraka amin’ny avy eo anivon’ny OMC. Nilaza izy ireo, tamin’ny fanambarana nataony teny Tsimbazaza, omaly, fa ilaina ny manao fangatahana rehefa hampiasa ny lalam-bahoaka sahala amin’ireny ataon’ny kandidà ireny. Handray ny andraikiny izy ireo manoloana ny tsy fanarahan-dalàna, araka ny resaka nataon’izy ireo tamin’ny mpanao gazety. Homena ny kianjan’Antsonjombe rahateo ny mpanao famoriam-bahoaka.
Ankoatra izay, namoaka fanapahan-kevitra ny prefektiora fa tsy azo atao ny mivezivezy amin’ny alina. Ora vitsy taorian’izay anefa dia nofoanana indray izany.
r.r
French