Lehilahy iray nangalatra gisa no matin’ny fitsaram-bahoaka. Tao amin’ny kaominina Feramanga Avaratra, distrikan’Ambatondrazaka no nisehoan’izany ny zoma 6 oktobra teo.
Efa lafony teny an-tsena ny gisa nangalarin’ny lehilahy iray, tao amin’ ny fokontany Ambohimanarivo, kaominina Feramanga, ny talata 3 oktobra teo. Malaza ratsy amin’ny hala-boty ao amin’io fokontany io ity lehilahy ity ka nandraisan’ny fokonolona kendry tohina. Very tokoa ny gisa an’ny mpiompy iray tao an-tanàna ka tratra tamin’izany ilay mpangalatra. “Nentin’ny fokonolona nihazo ny tsena izy rehefa voasambotra. Efa lafony teny tokoa io vorona nangalariny io”, hoy ny loharanom-baovao ao an-toerana. Nentina niverina tany an-tanàna, araka izany, ity lehilahy ity. Raikitra ny daroka sy ny vono nataon’ny fokonolona. Naratra mafy izy taorian’io ka nentina nihazo ny hopitalin’Ambatondrazaka. Tsy tana anefa ny ainy ny zoma lasa teo ka nitarika ny fahafatesany.
Efatra voasambotra
Toarian’ny fandevenana io lehilahy matin’ny fitsaram-bahoaka io, ny sabotsy 7 oktobra teo, niroso tamin’ny fanadihadiana ny zava-nisy marina ny mpitandro filaminana ao amin’ny kaominina Feramanga. Olona efatra tamin’ny fokonolona nosamborina ary hatao famotorana lalina. Voarohirohy ho tompon’andraikitra tamin’ ny fampiharana ny fitsaram-bahoaka izy ireo. “Tsy manam-baovao ho zaraina izahay hatreto”, hoy ny teo anivon’ny zandarimaria Ambatondrazaka raha nantsoina an-telefaonina mahakasika ity raharaha ity.
Tsiferana R.
French