Mahery vaika ny fifandonana eo amin’ny mpitandro filaminana sy ny dahalo any amin’ireo faritra voasokajy ho mena manerana ny Nosy. Dahalo enin-dahy maty voatifitra ny alin’ny alatsinainy 11 desambra teo.
Manoloana ny halatra omby miseho lany, dahalo enina raindahiny lavon’ny mpitandro filaminana, ny alin’ny 11 desambra teo. Distrikan’i Mandoto, Antsalova sy hatrany Andilamena no toerana nahafatesan’ny zandary azy ireo. Nitrangana halatra omby tao amin’ny fokontany Ambalakazaha, kaominina Masoarivo ny alatsinainy teo tamin’ny 11 ora maraina. Narahin’ny fokonolona sy ny zandary ireo dahalo ka tratra. Nikiry handositra anaty ala ireo olon-dratsy ka niara-lavo. Ankoatra io, lehilahy nitam-basy maty nandritra ny fifandonana tamin’ny mpitandro filaminana tao Andalamahitsy, fokontany Ambatotsipihina, kaominina Antanambao, distrikan’i Mandoto. Nitondra basy eran’ny tanàna io lehilahy io. Niafina anaty ala izy rehefa nahatazana ny zandary sady nitifitra. Vokany, namaly ny zandary ka lavo ilay dahalo.
Nandroba 700 000 Ar sy vary roa gony…
Nitrangana fanafihana mitam-piadiana tao Marogoaika, fokontany Beakanga, kaominina Vasiana, ny alin’ny 11 desambra teo tamin’ny 11 ora sy 45 minitra. Norobain’ny dahalo ny vola mitentina 7 hetsy Ar niampy vary roa gony sy ny akanjo tao amin’io tokantrano io. Nanara-dia avy hatrany ny zandarimaria sy ny fokonolona. Tsy lasa alavitra, maty voatifitra ny dahalo iray atao hoe Viza. Tafaporitsaka ny namany roa lahy. Tetsy ankilany, mbola lavon’ny zandary koa ny dahalo raindahiny iray tao amin’ny fokontany Ambohimarina, kaominina Antanetibe, distrikan’i Soavinandriana, afakomaly. Nangalatra omby izy roa lahy ireo ka nifanenjehan’ny fokonolona ary niara-tratra. Namaly ny iray. Maty voatifitra tamin’ny fotoana nokasaina handosirana, noho izany, io dahalo io. Hatolotra ny fampanoavana tsy ho ela kosa ilay namany.
Halatra omby tao Andilamena…
Lavon’ny zandary ny dahalo raindahiny tao Antanimenabaka, kaominina ambanivohitra anatin’ny distrika Andilamena, ny 7 desambra teo. Azo sambo-belona izy ka nentina natao fanadihadiana. Nilaza ny toerana misy ireo namany rehetra ary nanaiky hitondra ny mpitandro filaminana any amin’ny fieren’izy ireo. Nanao tari-dositra tampoka anefa io dahalo io ka nandritra izany no nahalavo azy. Efa dahalo nokarohina nanomboka ny taona 2016 ity lavo ity. Tompon’antoka tamin’ny fangalaran’omby miisa 95 tao amin’ny fokontany Tsaratsabo, kaominina Tanànanifololahy izy tamin’io taona io.
Tsiferana R.
French