Hotanterahina eto an-drenivohitra, anio, ny andro faharoan’ny fifaninanam-pirenena hahafantarana ireo ekipa roa midina any amin’ny diviziona faharoa, “Playout Coca-Cola PFL”, ho an’ireo kaonferansy roa, avaratra sy atsimo. Anisan’ny lalao tena andrasan’ny maro ny fifanandrinan’ny CFFA Andoharanofotsy sy ny Mama Fc, izay samy miray vondrona ao amin’ny Kaonferansy Atsimo. Hatao eny amin’ ny kianja CFFA Andoharanofotsy etsy Iavoloha izany.
Tsiahivina fa nisaraka ady sahala 0 no ho 0, ny roa tonta, nandritra ny fihaonan’izy ireo farany, ny volana febroary lasa teo. Raha ny vokatra teo amin’ny andro voalohan’ity fifanintsanana ity indray, manana isa telo ny CFFA Andoharanofotsy amin’izao fotoana izao, rehefa nandresy ny Dato Fc, 2 no ho 1, ny alahady teo. Ny Mama Fc kosa, tsy mbola manana isa, noho ny faharesena azon’izy ireo, 1 no ho 0, nanoloana ny Inate Fc Rouge Vakinankaratra.
Tsara marihina fa amin’ity fifanintsanana ity, hifandimby hihaona avokoa ireo ekipa efatra isaky ny Kaonferansy, ary lalao mandroso ihany no hatao. Izay laharana farany isam-bondrona no mihintsana any amin’ny diviziona ambany.
Tsara ny mampahatsiahy fa ny CFFA Andoharanofotsy, Dato FC, Mama FC, Inate FC Rouge Vakinankaratra no miatrika ity fifaninanana ity ho an’ny Kaoferansy Atsimo. Ny klioban’ny Ajesaia, Cosfa sy ny Uscafoot ary ny KFCA Diana, ny an’ny Avaratra.
Fitia Randria
Ireo fandaharan-dalao rehetra anio :
Kianja CFFA Andoharanofotsy :
8 ora sy sasany : Cosfa vs KFCA Diana
10 ora sy sasany : Dato FC vs Inate FC Rouge
12 ora sy sasany : Uscafoot vs Ajesaia
2 ora sy sasany : CFFA vs Mama Fc
French