Karate-Fampivondronana: tanjona ny ho tompondaka iraisam-pirenena

Niatrika fampivondronana nandritra ny 4 andro, teny amin’ny ANS Ampefiloha, ny mpikatroka karate, sokajy Poussins, Minimes ary Ben-
jamins, taranja karaté. 24 mianadahy izy ireo no nisitraka izany. Mpikarakara ny hetsika ny federasion’ny Karate-do malagasy. Notsongaina tamin’ny fiadiana ny amboaran’i Madagasikara “enfant” farany teo izy ireo.
Ny roa voalohany isaky ny sokajy no nalaina, niatrika ny fampivondronana teto Anta­nanarivo. Nambaran’ny filohan’ny federasionin’ny Karate-do malagasy, Ratefinanahary Émile, fa dieny izao dia mila manomana sy mikotrana mafy ny mpikatroka zandriny. “Izy ireo mantsy no hoavin’ny karaté malagasy. Tanjona ny hahatompondaka azy ireo amin’ny fifaninanana iraisam-pirenena”, hoy izy.
Fandaharam-potoan’ny federasiona manaraka ny fifaninanana “Challenge de Betsileo” izay hatao any Fianarantsoa, manomboka ny 8 aogositra izao. Manaraka izany ny fiadiana ny tompondakan’i Madagasikara amin’ny fahatelopolon’ny volana oktobra izao any Toliara. Hijerena ny tomban’ezaka ho an’ny mpikatroka manerana ny Nosy ireo fifaninanana ireo.

Mi.Raz