Namoaka fanambarana hentitra ny eo anivon’ny Fiadidiana ny Fanavaozana ny Repoblikan’i Madagasikara, ny faran’ny herinandro teo. Nohelohin’izy ireo tamin’izany ny fihetsiky ny fanjakan’i Eswatini.
«Manameloka tanteraka ny fandraisana ofisialy nataon’ny fanjakan’i Eswatini (Swaziland) ny filoha teo aloha, Rajoelina Andry, efa nesorina teo amin’ny fahefana ny fitondram-panjakana malagasy », hoy ny fanambarana. Nohitsin’ny ao amin’ny fiadidiana ny Fanavaozana ny Repoblika fa tena fanitsakitsahana ny fiandrianam-pirenena malagasy izany. Maniratsira ny fahatsiarovana ireo niharam-boina nandritra ny zava-nitranga mampalahelo tamin’ ny tolona nisy tamin’ny 2025 koa izany fihetsiky ny fanjakan’i Eswatini izany, araka ny fanambarana hatrany. « Tsy manana ny zom-pirenena malagasy intsony Rajoelina Andry, noho izy nisafidy zom-pirenena hafa, ary anisan’ireo namoahana ny didy fampisamborana iraisam-pirenena », hoy ny eo anivon’ny fiadidiana ny Repoblika.
Nanterin’ny fanambarana fa heverina ho fanelingelenana ny dingana ara-politika izao fihetsiky ny fanjakan’i Eswatini izao nefa eo am-panarenana ny fitoniana sy ny fampihavanam-pirenena i Madagasikara. Miaraka amin’ ny fanohanan’ny Sadc izany, araka voalazan’ny fanambarana. Notsiahivina koa fa efa nandefa taratasy ofisialy tany amin’ity vondrom-paritra ara-toekarena misy antsika ity sy any amin’ny filohan’i Afrika Atsimo ny fitondram-panjakana malagasy.
Fiarovana ny fiandrianam-pirenena
Manamafy izany taratasy izany fa tsy mihemotra amin’ ny fiarovana ny fiandrianam-pirenena sy ny hasin’ny vahoaka ary ny fahatsiarovana ireo niharam-boina ny mpitondra eto Madagasikara. « Tsy misy tombontsoa ara-politika na ara-drafitra afaka mihoatra ireo foto-kevitra fototra ireo », hoy ihany ny fanambarana.
Tsiahivina fa noraisin’ny mpanjakan’i Eswatini, i Mswati III, ny sabotsy teo, ny filoha teo aloha, Rajoelina Andry. Voaresaka tamin’izany ny toe-draharaham-pirenena eto Madagasikara sy ny fikaroham-bahaolana momba izany.
Synèse R.
French