Noraisin’ny minisi-panjakana eo anivon’ny fiadidiana ny Fanavaozana ny Repoblika, Razafimanantsoa Hanitra, ny ambasadaoron’ny Repoblika Federalin’i Alemana, i Olivier Knoerich, omaly.
Nivoitra, tamin’izany, fa mijanona ho mpiara-miasa amin’i Madagasikara eo amin’ ny sehatra ara-politika i Alemana. Naneho fahavononana ny masoivoho amin’ny hanohanana ny fanatanterahana ny fikaonandoham-pirenena. « Afaka mandefa manam-pahaizana momba ny fandrafetana Lalàmpanorenana izahay », hoy izy. Nanteriny fa voaresaka ao anatin’ny fanavaozana ny fanovana ny Lalàmpanorenana, hidirana amin’ny Repoblika fahadimy ary afaka mizara hevitra momba ny federalisma sy ny fitsinjaram-pahefana ihany koa ireo manam-pahaizana Alemà ireo. Mety ho voaresaka mandritra izany fikaonandoha izany ny fotokevitra sy ny rafitra federalisma, araka ny nambarany.
Nitondra fanazavana momba ny fizotrany sy ireo dingana ho amin’ny Fanavaozana kosa ny minisi-panjakana tamin’ny fihaonana. Tafiditra ao anatin’izany ny fomba entina manangona ireo antontan-kevitra rehetra sy ny fandraisana fanapahan-kevitra mandritra ny fikaonandoham-pirenena.
Fitarainan’ireo eny ifotony
Etsy andaniny, nangataka fiaraha-miasa ny hijerena akaiky sy hanavaozana ny fitantanana ireo faritra arovana eto Madagasikara ny ambasadaoron’i Alemana. Notsindriny fa velon-taraina ireo vondron’olona ifotony amin’ny tsy fisian’ny tamberim-bidy mankany amin’ny faritra misy azy ireny. Anisan’ ny soso-kevitra nentin’izy ireo amin’izany ny tokony hisian’ny fiaraha-miasan’ny manam-pahaizana momba ny faritra arovana ao amin’ny GIZ sy ny eo anivon’ny minisiteram-panjakana eo anivon’ny Fiadidiana ny Fanavaozana ny Repoblika. Tafiditra ao anatin’izany ny fanamafisana ny fanatsarana ny fitantanana ireo faritra arovana manerana ny Nosy.
Synèse R.
French