Noraisin’ny filohan’ny Fanavaozana ny Repoblika, ny Kly Randrianirina Michaël, teny amin’ny Lapam-panjakana Iavoloha ny masoivohon’i Sina entim-bahoaka, Ji Ping, omaly. Voaresaka sy voatsiahy tamin’izany ny fifandraisana eo amin’ny firenena roa tonta. Nitohy amin’ny fanaovan-tsonia ho fanamafisana izany ny fihaonana ka tafiditra ao anatin’izany ny fiaraha-miombona antoka eo amin’ny firenena roa tonta.
Anisan’ny niditra an-tsehatra amin’ny fanampiana sy fanohanana an’i Madagasikara koa anefa ny governemanta Sinoa manoloana izao voina mahazo ny firenena izao. Mitentina hatrany amin’ny 100 tapitrisa Yuan na 65 miliara Ar izany ary vola tsy averina na hakana tambiny avy amin’ny fitondram-panjakana malagasy. Haompana amin’ny laharam-pahamehana izany vola izany ho amin’ny fanarenana izany ka anisan’ny tafiditra ao anatin’izany ny lafiny fanabeazana sy ny fahasalamana ary ny fandaharanasam-panjakana.
Nambaran’ity ambasadaoro sinoa ity fa fanehoana ny fiaraha-mientana amin’ny vahoaka malagasy noho ny voina sy ny fahavoazana lehibe teto amin’ny firenena, manoloana ireo rivodoza indroa miantoana, Fytia sy Gezani nandalo teto izany. « Ao anatin’ny fahasahiranana lalina tahaka izao no tena ahafantarana ny tena namana », hoy ny filoham-panjakana, tamin’ny lahateniny.
Tsiahivina fa mivelatra amin’ny sehatra marolafy ny fiaraha-miasa amin’ny governemanta Sinoa. Anisan’izany ny sosialy, toy ny fahasalamana, ny fotodrafitrasa, toy ny lalana, ny sehatry ny fampianarana…
Synèse R.
French