Nosamborin’ny zandary ny lehilahy miisa valo voasaringotra amin’ny halatra vy ao Toamasina, afakomaly. Naharay loharanom-baovao momba ny fisiana andian’olona mikasa hangalatra vy tao amin’ny dépôt ao Betainomby, kaominina Toamasina II, ny mpitandro filaminana, ny 24 aogositra lasa teo. Nanao vela-pandrika ny ekipan’ny zandary ka niatrana tamin’ny toerana voatondro. Sarona nandritra io fotoana io ny fiara sprinter iray nokasain’ireo mpangalatra hitaterana ny vy. Tsy nahavita nampiditra ny entana akory, noraisim-potsiny ireo mpanao ratsy. Olona miisa valo voasambotra. Ahina ho tambajotra iray mpangalatra vy ao Toamasina izy ireo. Naiditra am-balam-pamonjana ny fiara. Nogiazana ny vy nangalarina ary notanana atao famotorana izy valo lahy. Hatolotra fampanoavana aorian’ izay. Tsiahivina fa niteraka savorovo tamin’ny mponina ao Toamasina ny fisiana tranga halatra vy izay niseholany nanomboka ny fiatombohan’ity volana aogositra ity. Tsy mifidy hangalarina ireo mpanao ratsy fa ravain’izy ireo hatramin’ny andrin-jiro vita amin’ny «béton» tsy miasa, hangalany ny vy ao anatiny.
Tsiferana R.
French