Notontosaina tetsy amin’ny Kianja Synthétique Betongolo ny andro fahavalon’ny fiadiana ny ho tompondakan’i Madagasikara, diviziona faharoa, nasionaly. Nisongadina indray ny ekipan’Analamanga, Disciples FC Espoir, tamin’ity. Nomontsanin’izy ireo, tamin’ny isa 6 no ho 2, ny mpilalaon’i Manakara. Raha hiverenana ny fihaonan’ny roa tonta, ny mpilalaon’ny Zanagasy no nitarika 1 no ho 0 vao iray minitra nanombohan’ny lalao. Efa tany amin’ny fahafolo minitra vao nahasahala ny isa, i Regino, lohalaharan’ny Disciples Analamanga. Taitra tamin’ny torimasony ny mpilalao an’ Analamanga ka nanomboka nampiseho ny haavo teknika sy ny fahaiza-miaraka. Vokany, mora ho azy ireo ny naka ny fandresena 6 no ho 2 tamin’ity fifanandrinana ity. Mitana ny laharana fahatelo izany, hatreto, ny Disciples Analamanga, manana isa 16. Mbola mihazona ny laharana voalohany hatrany kosa ny GNFC. Resin’izy ireo tamin’ny isa 3 no ho 2, ny FC 2A CFT 3FY Plus. Manana isa 24 ry zareo izao. Tsiahivina fa raha tsy misy ny fiovana dia ireo roa voalohany amin’ity no hiakatra “Pro League”.
Fitia Randria
French