Mbola eo hatrany. Maka bahana ho amin’ny fihaonambe ny eo anivon’ny antoko ny Asa vita ifampitsarana-Avi. Maherin’ny 1 000 ireo mpikambana hiatrika izany, eny amin’ny CCI Ivato, ny 20 febroary izao. Ahitana olom-boafidy tamin’ny anaran’ny antoko, toy ny depiote, ben’ny Tanàna ary mpanolotsain’ny kaominina, izy ireo. Nambaran’ny filoha nasionaly, ny solombavambahoaka, Andriamiharivolamena Zavamanitra, fa hatao indrindra izao fihaonambe izao hanamafisana ny firaisankina sy ny fandraisan’ andraikitry ny olom-boafidy
ao amin’ity antoko, naorin-dRatsirahonana Norbert Lala, ity. « Hiresahana ny toe-draharaham-pirenena ka hametrahana fanamby ara-toekarena, ara-tsosialy ary ara-pitantanana maro », hoy izy. Nanteriny fa kendrena koa ny hampahafantarana sy hanentanana ireo olom-boafidy hanentana eny ifotony mba hanaraka ny làlam-piheverana sy ny paikadin’ny antoko, manoloana ny zava-misy ankehitriny, eto amin’ny firenena.
Natsidiny koa fa haseho amin’ny fomba ofisialy amin’io fotoana io ny fandaharanasan’ny antoko, araka ny lohahevitra « Madagasikara miorina amin’ny harem-pireneny ». Notsindriny fa anjara birikiny lehibe amin’ny fanarenana sy fanavaozana ny firenena ary amin’ny fampandrosoana ara-toekarena izany. « Maneho ny vina hananganana fampandrosoana maharitra mifototra amin’ny fanajariana sy fanomezan-danja ny harem-pirenena ary amin’ny fanamafisana ny fahaleovantena ara-toekarena », hoy ihany izy.
Notsiahiviny fa refesina amin’ny isan’ireo olom-boafidy ananany, ny herin’ny antoko politika iray. Eo koa ny fahavitrihana sy ny fandraisan’anjaran’ireo mpikambana. Miasa tsy an-kijanona amin’ny fanamafisana izany ny antoko, araka ny nambarany.
Synèse R.
French