Notsiahivin’ny depiote voafidy tao Arivonimamo, Rajerison Antoine, fa herintaona aty aoriana, mbola tsy misy tondrozotra sy daty mazava momba ny fakan-kevitra nasionaly, ny fitsapankevi-bahoaka ary ny fifidianana. « Aiza ny fanarahamason’ny HCC amin’izany ? Tsy tokony ho lasa tetezamita tsy misy fiafarana ny Fanavaozana », hoy izy.
Nanteriny fa anisan’ny antony nametrahany ny fitoriana teny anivon’ny HCC izany, nampahatsiahivana ireo andinin-dalàna. Tsy mahavita sy tsy manatanteraka ny andraikitra nankinina taminy ny mpitondra amin’izao fotoana izao, araka ny nambarany hatrany. Nohitsiny fa tsy olona ovaina no notakin’ny vahoaka. « Rafitra sy fomba fiasa miova no nidinana an-dalambe. Tsy tokony hitantana firenena amin’ny rafitra efa hita fa tsy nahomby isika, nefa tsy misy dingana mazava hanovana izany », hoy ihany izy.
Nanteriny fa anisan’ny antony nitolomana ny hametrahana firenena tsara tantana hanorenana rafitra vaovao hiantohana ny rariny. Eo koa ny tamberin’andraikitra ary ny fitsinjara-pahefana tena izy sy ny harem-pirenena ara-drariny ho tombontsoan’ny vahoaka malagasy. « Mitaky tondrozotra mazava sy fe-potoana arahina ny firenena », hoy ihany ity depiote voafidy tany Arivonimamo ity. Tsy hita ny tena niova ary tsy mazava ny lalana hizorana. Tsy hita izay hiafarana, araka ny nambarany hatrany. Fampanantenana no betsaka, fa ny tena fanovana mbola tsy hita taratra. « Ny vahoaka mbola mijaly, ny lalan’ny tolona mivaralila ary ny fanantenana mihalefy », hoy izy.
Synèse R.
French