Notontosaina omaly, teny Ambaranjana, ny lanonana fandraisana ireo mpilatsaka an-tsitrapo vaovao ao amin’ny Peace Corps Madagascar. Miisa 17 mianadahy ry zareo no nanao fianianana teo anatrehan’ny lefitry ny Masoivoho amerikanina mpisolo toerana, Steve Bremner. Raha ny fanazavana azo, nandrato fiofanana nandritra ny folo herinandro teo izy ireo, niompana tamin’ny sehatra maro. Hiasa eto an-tanindrazana mandritra ny roa taona. Anisan’izany ny fanabeazana, ny fahasalamana, ny fambolena ary ny fampiroboroboana ny teny anglisy. Ny volana aogositra lasa teo no tonga teto Madagasikara izy17 mianadahy. Ankoatra azy ireo, nandray mpilatsaka an-tsitrapo iray hafa koa ny Peace Corps Madagascar, izay vao avy niasa tany Maroc ary hanohy izany eto an-toerana. Ny taona 1993 no nanomboka niasa an-tsitrapo teto Madagasikara ireo avy amin’ny Peace Corps rehefa nahazo fahazoan-dalana avy amin’ny governemanta malagasy. Nanomboka teo, 1 700 izy ireo no efa niasa teto Madagasikara.
Fitia Randria
French